Dagur friðar

Sandgerðisskóli hélt á dögunum upp á alþjóðadag friðar með fjölbreyttum verkefnum þar sem nemendur fræddust um frið, sanngirni og mikilvægi þess að stuðla að jákvæðu og umhyggjusömu samfélagi. Dagurinn markaði jafnframt þá áherslu skólans að menntun snúist ekki einungis um bóklegt nám heldur einnig um félagsfærni, virðingu og samskipti.

Í upphafi dags fóru kennarar yfir glærur með nemendum þar sem fjallað var á einfaldan hátt um hvað friður og réttlæti þýða í daglegu lífi barna. Umræðurnar sneru meðal annars að því hvernig við getum verið góð við hvert annað, leyst ágreining með samtali og tekið eftir því þegar einhver þarf stuðning.

Nemendur ræddu mikilvægi þess að sýna sanngirni í leik og starfi og skoðuðu dæmi úr eigin umhverfi, hvort sem það tengdist leikvellinum, hópastarfi eða samskiptum í skólastofunni.

Nemendur fengu að kynnast nokkrum þekktum friðarsinnum úr sögunni og hvernig hugrekki, samkennd og mannréttindi hafa átt stóran þátt í að skapa betri heim.

Nemendur unnu skapandi verkefni þar sem þeir tjáðu eigin hugmyndir um frið með myndum, föndri, textagerð eða umræðum. Sumir teiknuðu friðartákn, aðrir skrifuðu falleg skilaboð og margir ræddu saman um hvernig þeir gætu stuðlað að friðsælu andrúmslofti í skólanum.

Sandgerðisskóli er UNESCO-skóli og er dagurinn hluti af fræðslu sem byggir á heimsmarkmiðum, mannréttindum, ábyrgð og góðum samskiptum. Smellið hér til að sjá fleiri myndir frá deginum.