Skólahjúkrun

Skólahjúkrunarfræðingur Sandgerðisskóla

Heilsuvernd skólabarna í Suðurnesjabæ er á vegum Heilbrigðisstofnunar Suðurnesja.

Skólahjúkrunarfræðingur við Sandgerðisskóla er Sara Dröfn Valgeirsdóttir.

Skólahjúkrunarfræðingur starfar í skólanum á miðvikudögum og fimmtudögum. Alla jafna er hún við störf frá kl. 9:30 til 14:00 þessa daga. Alltaf er hægt að senda skólahjúkrunarfræðingi tölvupóst á netfangið sandgerdisskoli@hss.is. Einnig er hægt að senda skilaboð í Mentor eða hringja í Sandgerðisskóla í síma 425 3100 og óska eftir símtali.

Opnir viðtalstímar hjúkrunarfræðings

  • Miðvikudagar kl. 10:00-12:00
  • Fimmtudagar kl. 10:00-12:00

Neyðar- og hjálparsímanúmer heilbrigðisþjónustunnar eru 1700 og 1717.

Heilsuvernd skólabarna er hluti af heilsugæslunni og framhald af ung- og smábarnavernd. Markmið hennar er að efla heilbrigði nemenda og stuðla að vellíðan þeirra.

Starfsfólk heilsuverndar skólabarna vinnur í náinni samvinnu við foreldra, skólastjórnendur, kennara og aðra sem koma að málefnum nemenda, með velferð þeirra að leiðarljósi. Farið er með allar upplýsingar sem trúnaðarmál. Þjónusta heilsuverndar skólabarna er skráð í rafræna sjúkraskrá heilsugæslunnar.

Helstu áherslur í heilsuvernd skólabarna eru forvarnir, fræðsla, skimanir og bólusetningar. Unnið er samkvæmt leiðbeiningum Þróunarmiðstöðvar íslenskrar heilsugæslu og Embættis landlæknis um heilsuvernd grunnskólabarna. Nánari upplýsingar má finna á eftirfarandi slóð: Heilsuvernd skólabarna: https://throunarmidstod.is/svid-thih/heilsuvernd-skolabarna/

Heilbrigðisfræðsla

Skipulögð heilbrigðisfræðsla er veitt í öllum árgöngum með áherslu á að hvetja nemendur til heilbrigðra lífshátta. Að lokinni fræðslu fá foreldrar upplýsingar í tölvupósti um efni hennar. Þannig gefst þeim kostur á að ræða við börn sín um það sem þau lærðu og hvernig hægt er að nýta þá þekkingu í daglegu lífi.

1. bekkur – Líkaminn minn - Forvörn gegn kynferðislegu ofbeldi og Hjálmanotkun

2. bekkur – Tilfinningar

3. bekkur – Verkefnabók um 6H heilsunnar (Hamingja, Hollusta, Hreinlæti, Hreyfing, Hvíld)

4. bekkur – Kvíði og Slysavarnir

5. bekkur – Samskipti

6. bekkur – Kynþroski og Endurlífgun

7. bekkur – Bólusetningar

8. bekkur – Sjálfsmynd-Samskipti, Hugrekki og Endurlífgun

9. bekkur – Kynheilbrigði og Bólusetning

10. bekkur – Geðheilbrigði, Endurlífgun og Ábyrgð á eigin heilsu

Markmið hverrar fræðslu eftir árgöngum er hægt að sjá á Heilsuvera.is

Skimanir

Skimað er fyrir ákveðnum heilbrigðisvandamálum og eru skimanir framkvæmdar í 1., 4., 7. og 9. bekk. Þær felast í mælingu á hæð, þyngd og sjónskerpu. Nemendur í öðrum árgöngum eru skimaðir eftir þörfum. Ef frávik reynist í skimun er ávallt haft samband við forráðamann. Ef ástæða þykir til vísar skólahjúkrunarfræðingur nemanda til læknis.

Heilsueflandi viðtöl um lífsvenjur og líðan

Þegar skimanir fara fram í 1., 4., 7. og 9. bekk ræðir skólahjúkrunarfræðingur við nemendur um líðan og lífsvenjur. Markmið viðtalanna er að styrkja vitund nemenda um eigið heilbrigði og líðan. Einnig að geta gripið til úrræða ef vart verður við vanlíðan eða áhyggjur.

Bólusetningar í 7. bekk

Bólusetningum er ætlað að verja einstaklinga gegn alvarlegum smitsjúkdómum.

Í 7. bekk er bólusett gegn mislingum, hettusótt og rauðum hundum (ein sprauta) auk HPV (Human Papillomavirus), sem getur valdið ýmsum tegundum krabbameina, þar á meðal leghálskrabbameini.

HPV-bólusetning er gefin í tveimur skömmtum með sex mánaða millibili.

Bólusetningar í 9. bekk

Í 9. bekk er bólusett gegn barnaveiki, stífkrampa, kíghósta og mænusótt (ein sprauta). Áður en bólusetning fer fram fá foreldrar tölvupóst með upplýsingum um tímasetningu hennar.

Nemendur í öðrum árgöngum eru skoðaðir eða bólusettir eftir þörfum.

Hafið samband við skólahjúkrunarfræðing ef:

  • óskað er eftir nánari upplýsingum,
  • talið er að barn sé ekki að fullu bólusett,
  • óskað er eftir að barn fái ekki bólusetningu.

Það er á ábyrgð foreldra eða forsjáraðila að sjá til þess að börn þeirra fái þær bólusetningar sem þeir kjósa að þiggja.

Hagnýtar upplýsingar

Veikindi og slys

Ef óhapp eða slys verður á skólatíma veitir starfsfólk skólans fyrstu hjálp. Ef nemandi þarf að fara á heilsugæslu eða slysadeild þurfa foreldrar eða forráðamenn að fylgja barninu. Því er mikilvægt að skólinn hafi ávallt réttar upplýsingar um símanúmer þar sem hægt er að ná í foreldra eða forráðamenn á skólatíma barnsins.

Ekki er ætlast til að heilsuvernd skólabarna sinni óhöppum eða slysum sem verða utan skólatíma.

Langveik börn

Mikilvægt er að skólahjúkrunarfræðingur hafi upplýsingar um börn sem eru með fötlun eða langvinnan og/eða alvarlegan sjúkdóm, svo sem sykursýki, ofnæmi, flogaveiki, blæðingarsjúkdóma eða aðra alvarlega sjúkdóma.

Hlutverk skólahjúkrunarfræðings er að stuðla að því að þessi börn fái viðeigandi umönnun og aðstæður í skólanum í samvinnu við foreldra, forráðamenn og starfsfólk skólans.

Lyfjagjafir

Samkvæmt tilmælum embættis landlæknis um lyfjagjafir í grunnskólum gilda sérstakar verklagsreglur um lyfjagjafir til nemenda á skólatíma. Þar kemur meðal annars fram að skólabörn skulu ekki fá önnur lyf í skólanum en þau sem læknir hefur ávísað.

Í engum tilvikum bera börn ábyrgð á eigin lyfjatöku. Sú ábyrgð hvílir á foreldrum eða forráðamönnum. Nemendur skulu almennt ekki hafa lyf undir höndum nema í sérstökum undantekningartilvikum, til dæmis þegar um insúlíngjafir er að ræða og nemandinn sér sjálfur um meðferðina.

Foreldrar eða forráðamenn barna sem þurfa að taka lyf á skólatíma skulu hafa samband við skólahjúkrunarfræðing til að skipuleggja lyfjagjöf meðan á skóladegi stendur.

Tannvernd

Mikilvægt er að allir nemendur séu skráðir hjá heimilistannlækni. Skólahjúkrunarfræðingur hefur samband við foreldra eða forráðamenn ef svo er ekki.

Einnig fara fram tannskoðanir hjá nemendum samkvæmt verklagi heilsuverndar skólabarna.

Höfuðlús og njálgur

Höfuðlús kemur reglulega upp í skólum landsins og því er mikilvægt að foreldrar kembi hár barna sinna reglulega yfir skólaárið.

Verði vart við lús í hári barns er mikilvægt að láta skólann vita. Skólahjúkrunarfræðingur getur veitt leiðbeiningar um meðferð og varnir gegn frekara smiti.

Sömu reglur gilda um njálg. Mikilvægt er að upplýsa skólann ef smit greinist og hefja meðferð sem fyrst.